Размер:
AAA
Кернинг:
КK К K К  K
Цвет: CCC
Изображения Вкл.Выкл.
Обычная версия сайта
Вернуться к русскому языку Translate into English Ins Deutsche bersetzen
Версия для слабовидящих
Поиск
677000, Республика Саха (Якутия), г. Якутск, проспект Ленина, д. 15, каб. 102-105
Наш адрес
+7 (4112) 40-80-53
Контактный номер

"Саһарҕа" кулууп ыалдьыта – норуот маастара Маргарита Степанова

"Саһарҕа" кулууп ыалдьыта – норуот маастара Маргарита Степанова


"Саһарҕа" кулууп ыалдьыта – норуот маастара Маргарита Степанова

 

Норуот үйэлэргэ өлбөт-сүппэт барҕа баайа – кини култуурата уонна искусствота буолар. Оттон төрүт култуура диэн норуот олоххо-дьаһахха, үлэҕэ-хамнаска, өй-санаа, сиэр-майгы өттүнэн атын омуктартан туох уратыны айбыта-туппута барыта ааттанар.

Дьокуускай куорат “Мир приключений” библиотекатын иһинэн үлэлиир Автодорожнай уокурук ветераннарын “Саһарҕа” кулууба Арассыыйа норуоттарын култуурунай нэһилиэстибэ сылыгар анаан интэриэһинэй тэрээһиннэри ыытар. Ол курдук иистэниэн баҕалаах ветераннарга маастар-кылаастар буолаллар. Бу маастар-кылаастары иилээн саҕалаан ыытта норуот маастара, үлэ ветерана - Маргарита Васильевна Степанова. Маастар-кылаастарга кыттыбыттар саахыматтыы олбохтору, кыбытыктаан тигэргэ уонна сахалыы бытырыыстаах былааты ыһыахтарыгар оҥостоннор үөрдүлэр. 

 

Маргарита Васильевнаны кытары сэһэргэстибит:

Маргарита Васильевна бэйэҕит туһунан билиһиннэриэххит дуо?

Мин 1970 сыллаахха иис үөрэҕин бүтэрбитим. Идэбинэн үс сыл курдук үлэлээбитим. Онон эдэр эрдэхпиттэн кыралаан иистэнэбин. Оҕолорум кыраларыгар 1990 сылтан детсакка, оскуолаҕа кэтэллэригэр наряднай таҥастарын, кууркаларын тигээччибин. Кыра оҕом детсакка ыллыыр-туойар буолан сыанаҕа кэтэр таҥастарын араастаан быһыылаан тигээччибин.

 

Хаһааҥҥыттан саҕалаан сахалыы таҥаһы тигэҕиний?

2000 сыллартан сахалыы таҥас тигэн саҕалаабытым. 2016 сыллаахха Россия норуотун маастара Козлова Дария Семеновнаҕа саха таҥаһын тигиитин мындырыгар үөрэммитим. Онтон ыла үлүһүйэн туран сахалыы дьахтар, эр киһи ырбаахыларын, соннорун тигиинэн дьарыктанабын.

Быыстапкаларга кыттааччыгын дуо?

Мэҥэ-Хаҥаласка сыл аайы ыытыллар культура эстафетатын быыстапкатыгар, дойдубар Мэлдьэхсилэргэ кыттабын.

 

Номнуо ыһыахха кэтээри сахалыы таҥаска сакаас киирэн эрдэҕэ...

Оннук, киирэн, билигин эр киһи комзолун тигэ сылдьабын, традиционнай таҥастары тигэ сатыыбын. Сахалыы халадаай, хаһыаччык сакаастаан тиктэрэллэр, сахалыы оноолоох чараас сайыҥҥы сону эмиэ сакаастыыллар. Билигин дьонтон сакаас ылан күннэтэ иистэнэр дьарыкпын ыһыктыбакка үлэ үөһүгэр сылдьабын.

Мастер-класс ыытаҕын дуо иискэ...

Кыралаан ыытабын, кэлин син интэриэһиргиир буолан эрэллэр, элбэх киьи кыттыыны ылаллар. Залогтааҕы “Мир приключений” библиотека иһинэн улэлиир Автодорожнай уокурук ветераннарын “Саһарҕа” түмсүүтүгэр хаста да сылдьан мастер-класс ыытан турабын. “Саһарҕа” түмсүү кыттыылаахтарыгар бытырыыстаах былаат, кыбытыктаан тигиигэ, олбох оҥорууга бэйэм иистэнэр албаспын көрдөрөн биэрбитим. Онон дьарыктанан бары да элбэҕи биллилэр, ылыннылар.

 

Иистэнэргиттэн төһө дуоһуйууну ылаҕыный?

Иистэнэрбин сөбүлүүбүн, эбэһээт тугу эмэ тикпит киһи диибин. Иистэннэхпинэ ииһим эрэ буолар, аһыырбын, утуйарбын да умнабын. Иистэнэ олорон наар үчүгэйи эрэ саныыбын, бу тигэ олорор таҥаспын кэтэн күөх хонуу устун дайа сылдьалларын. Сорохтор, дьэ бу хаппырыыс киһи эбит, табыллыбат дииллэр, мин ону хайдах эрэ итэҕэйбэт курдукпун, бэйэҥ хайдах настарыанньалааххыттан тутулуктаах дии саныыбын. Иистэнэр кэмҥэ наар үчүгэйи санаан ииһим иһигэр киирэн хаалабын. Саамай соһуйбутум диэн баар, кыра оҕобор, Өлүөхүмэ ыһыаҕар кытта барар таҥаһын тигэр кэммэр, оҕом хайаан да бу таҥаһы кэтэн туран выступаайдаан үрдүк чыпчаалга тахсыахтаах диэн. Кырдьык оҕом Гран при тутар чиэскэ тиксэн соһуппута, онон иистэнэр кэмҥэ, иискэ киирэн наар учугэйи эрэ ыралаатахха иис табыллар.

Иистэнэрбиттэн дуоһуйабын даҕаны, сынньанабын даҕаны диэхпин сөп.

 

Ити курдук биһиги бүгүҥҥү ыалдьыппыт хайдах курдук иистэнииттэн дьоллонорун туһунан сэһэргээтэ. Маргарита Васильевнаҕа өссө да таһаарыылаах үлэлэри, уһун олоҕу, бары үтүөнү баҕарабыт. Сэргээбит ааҕааччыны уонна иистэниэн баҕалааҕы виртуальнай быыстапканы көр диэн ыҥырабыт http://vv.cbsykt.ru/iis-uus-abyla .

“Мир приключений” библиотека аадырыһа Дежнев уул., 51, билсэр тел.: 35-46-58

 

                                                       Кэпсэттэ “Саһарҕа”кулууб салайааччыта, 2 категориялаах библиотекарь Эсланда   Афанасьевна Винокурова